Кинъёс Евангелиын Кузё-Инмарлэн Иисус Христослэн «агай-вынъёсыз» нимасько?

Кузё-Инмарлэн «агай-вынъёсыз но сузэръёсыз», кудъёсыз сярысь вера Евангелие, уг возьматы, соос, туала валанъя, Кузё-Инмарлэн вирызъя матысь ӵыжы-выжыосыз вал шуыса. Со вакытэ шундыӝужанпал калыкъёслэн сям-йылолзыя (Палестинаын но Пичи Азиын улӥсь араб калык пушкын али но утисько на та сямъёс), «агай-вынъёс» шуыса нимасько туж матысь гинэ ӧвӧл, нош кыкетӥ, куинетӥ выжыысь, солэсь но кыдёкынгес ӵыжы-выжыос.

Кузё-Инмарлэн вирызъя агай-вынъёсыз ӧй вал, малы ке шуоно, Инмар Анайлэн, кудзэ Святой Черк Дун-Сьӧлыктэм шуэ, Одӥг гинэ Пиез Кузё-Инмар Иисус Христос вал. Мария Христослэн вордскемез азьвыл но, вордӥськон дыръя но, собере но сыӵе ик Дун-Сьӧлыктэм кылиз, малы ке шуоно, со Инмарлы кылзэ сётӥз, ноку но кышно уз луы шуыса. Святой Иосиф Солэн вылласянь адӟиськоно гинэ, ныллыксэ утись кузпалэз вал. Озьыен, Кузё-Инмарлэн вирызъя «агай-вынъёсыз но сузэръёсыз» луыны быгато вал Дун-Сьӧлыктэм Анаезъя кыкетӥ, куинетӥ выжыысь ӵыжы-выжыосыз, малы ке шуоно, Солэн вирызъя атаез ӧй вал бере, агай-вынъёсыз но луыны ӧз быгатысалзы.

Ачиз Евангелие уг валэкты, кыӵе ӵыжы-выжыос луо «Иисуслэн агай-вынъёсыз», куд-огъёсыз нимзыя ке но пусйемын: Иаков, иосия, Симон но Иуда (Матф.13:54-56). Трос гожтэмын ни «Кузё-Инмарлэн агай-вынъёсыз» сярысь, трос дэмламын та пумысен пӧртэм малпанъёс но валэктонъёс, нош ваньмыз соос юн-юн инъет вылын уг сыло.

Зэмзэ ик та Кузё-Инмарлэн вирызъя агай-вынъёсыз ке, соку соос Кузё-Инмардэн куинетӥ выжыысь агай-вынъёсыз луыны быгатозы. Матфей Апостол соослэн анаенызы Иаков Марияез нима (со ик Клеопа Мария), кудӥз, эскерисьёслэн верамзыя, Дун-Сьӧлыктэм Мариялэн кыкетӥ выжыысь сузэрез луэ. Иоанн Апостол озьы ик нима сое «Солэн Анаезлэн сузэрез» (19, 25).

Но та Кузё-Инмарлэн агай-вынъёсыз луыны быгатозы Иосиф атаезлэн нырысетӥ кузпалъяськонэзлэн пиосыз (Дун-Сьӧлыктэм Марияен кузпалъяськемзэсь азьвыл). Татын номыр паймымонэз ӧвӧл, кылсярысь, Марк Апостол Утисьлэсь ӵыжы-выжыоссэ лыдъянэз, еврей законъя, Иосифлэн выжыезъя нуэ. Та сярысь верало иудейёслэн Утись сярысь верам кылъёссы: «Кытысь Солэн сыӵе визьнодэз но кужмыз? Плотниклэн пиез ӧвӧл-а Со? Анаез Солэн Мария ӧвӧл-а, нош агай-вынъёсыз Иаков но Иосий, Симон но Иуда (Фаддей) ӧвӧл-а? Нош сузэръёсыз Солэн асьме пӧлын ӧвӧл шат? Кытысь соку Солэн та ваньмыз?» (Матф.13:54-56). Та сярысь ик вера Иоанн Апостол но: «Соку Солэн агайёсыз шуизы: пот татысь (Галилеяысь, Ас коркаысьтыд) но мын Иудеяе, Тынад дышетскисьёсыд но мед адӟозы ужъёстэ, кудъёссэ Тон лэсьтӥськод»(7,3). Кузё-Инмарлэн агай-вынъёсыз со Иосифлэн нырысетӥ кузпалъяськонэзлэн нылпиосыз шуыса веран туж вашкала предание луэ ни.

Та вашкала веранлы нокин но пумит ӧй луысал, Матфей Апостол ӧй шуысал ке, Иаковлэн но Иосийлэн анайзы Мария вал, кудзэ Иоанн Апостол Клеопа Мария, Солэн Анаезлэн сузэрез шуэ (Матф.27:56; Инн.19:25); соин ик куд-ог эскерисьёс, Кузё-Инмарлэн агай-вынъёсыз со куинетӥ выжыысь ӵыжы-выжыосыз луо шуыса малпанэ вуизы. Но Дун-Сьӧлыктэм Православной Черк та вашкала преданиез уг палэнты бере, со сярысь вераны кулэен лыдъяськомы.

«Дун-Сьӧлыктэмъёслэн Улоназы» (Четьи-Минеиын) 26-тӥ толсурлы гожтэмын,  дун-сьӧлыктэм Иосиф Иаковлэн пиез, нош Иаков Матфатлэн пиез вал шуыса. Иаков аслаз братэзлэн кышноеныз кузпалъяськемын вал та пумысен законъя, малы ке шуоно, братэзлэн нылпиез ӧй вал. Та законын гожтэмын вал, нылпиез ӧвӧлтэм пиосмурт кулӥз ке, солэн братэз басьтыны кулэ солэсь кышнозэ но «братэзлэсь выжызэ улӟытыны» (Кыкетӥ закон 25:5-6). Та законъя, Иосиф Илиялэн пиез, вирызъя нош Иаковлэн пиез ке но вал. Тини малы св. Лука Евангелист, Христослэсь ӵыжы-выжыоссэ лыдъяса, Илияез Иосифлэн атаез шуиз но Христос сярысь тазьы вераз: «Иисуслы, служенизэ кутскыкуз, куамын арес вал, но Со, кызьы малпазы, Матфатлэн, Илиялэн, Иосифлэн Пиез вал…» (Лк.3:23).

Вашкала грек историк Никифор, св. Ипполитэн соглаш луыса, вера, св. Иосиф Саломияез кышно басьтӥз шуыса, но эн малпалэ, со Вифлеемысь Кузё-Инмарлэн песянаез шуыса нимам Саломия, ӧвӧл, та мукетыз Саломия. Уго соиз Елисаветалэн но Дун-Сьӧлыктэм Инмарез Вордӥськытэмлэн ӵыжы-выжыез вал, нош таиз Аггейлэн, Захариялэн, Пылатӥсьлэн атаезлэн братэзлэн нылыз вал. Аггей но Захария нош Варахия священниклэн пиосыз вал. Св. Иосифлэсь Аггейлэн нылыз Саломия ньыль пи ваиз: Иаковез, Симонэз, Иудаез, Иосияез но кык нылъёсты Есфирез но Фамарез, яке, кызьы шуо на сое — Марфаез, нош синаксарь(праздникъёсты валэктӥсь богослужебной книгаысь черк дышетон). Мироносицаослэсь арнязэс валэктыса, Зеведейлы бызем Саломия нылзэс но пусъё на. Нош Георгий Кедрин, Иосифлэсь кык нылъёссэ пусйыкуз, вера, одӥгез, Мария, Иосифлэн братэзлы Клеопалы, Иосифлэн Египетысь берытскемез бере ни быземын вал шуыса, нош таиз Мария, Марфа но Фамарьлы укша кадь (грузин святцыосын тупаса улон ваись кышноос пӧлын, Тамара нимо св. Фамарез но сӥлы каро). Нош кӧня гинэ Иосифлэн нылъёсыз вал но кыӵеез нылыз вал со, — одӥгез одно ик зэм луэ: Иосиф кышнояськемын вал но солэн пиосыз но нылъёсыз вал.

Саломия кышноезлэн кулэм бераз, Иосиф кема дыр ӵоже огназ дун-чылкыт улӥз.

Св. Евангелие солэн дун-сьӧлыктэм но дун-чылкыт улонэз сярысь туж вакчи ушъян кылъёсын вера: «Иосиф нош, Солэн кузпалэз, шонер улӥсь мурт…» (Мтф.1:19). Солэсь но бадӟым кылъёс луозы-а? Со сокем шонерлыко вал, аслаз дун-сьӧлыктэм улонэныз вань шонерлыко улэм атайёслэсь но патриархъёслэсь вылӥегес пуктэмын вал. Уго кин соос пӧлысь ярамон вал Дун-Сьӧлыктэм Инмар Анайлэн кузпалэз луыны? Нош кинлы сыӵе дан сётэмын вал Христослэн нимам атаез луыны? Зэмзэ но со ярамон вал сыӵе данэ потыны аслаз дун-сьӧлыктэм ӟечлыко улонэз пыр. Куке со пересьмиз, тямыстон арес луиз, солы оскемын вал Дун-Сьӧлыктэм Мария Нылмурт, солэсь ныл луонзэ утьыны.Со туж тэрытскыса но кышкаса служить кариз Солы, Инмар Анайлы кадь, аслаз но вань дуннелэн Куз-Анаезлы кадь (уйвӧтаз лыктэм Кылчинлэн верамезлы оскыса), озьы ик, Солэсь вордскем Инмарнунылы, ас киыныз ужаса но Соосты сюдыса. Св. Иосиф сю дас арес луыса кулӥз.

#Духовное_просвещение

Добавить комментарий

Ваш e-mail не будет опубликован. Обязательные поля помечены *